मुंबई : शहराच्या वाहतूक व्यवस्थेतील दीर्घकालीन अडथळे दूर करण्याच्या उद्देशाने ऑरेंज गेट टनेल प्रकल्पातील टनेल बोरिंग मशीन (TBM) चा लोकार्पण सोहळा आज पार पडला. मुख्यमंत्री देवेंद्र फडणवीस यांनी या महत्त्वाकांक्षी प्रकल्पाला “मुंबईचा भविष्यातील गेमचेंजर” असे संबोधले. ईस्टर्न फ्रीवे आणि कोस्टल रोड यांना जोडणारा हा टनेल पूर्ण झाल्यानंतर मुंबईकरांना मध्य-दक्षिण मुंबईतील प्रचंड ट्रॅफिकपासून मोठा दिलासा मिळणार आहे.
फडणवीस म्हणाले की, “सध्या ईस्टर्न फ्रीवेमधून दक्षिण मुंबईकडे येणाऱ्या वाहनांना सीएसटीएममार्गे मोठा फेरफटका मारावा लागतो. परिणामी ट्रॅफिक जाम, वेळेचा अपव्यय आणि प्रदूषण वाढत आहे. कोस्टल रोड आणि ईस्टर्न फ्रीवे यांच्यातील थेट जोडणीमुळे विमानतळ, नवी मुंबई तसेच पश्चिम उपनगरांतील नागरिकांचा प्रवास सहज-सुलभ होणार आहे.”
इंजिनियरिंग क्षेत्रातील एक 'मार्बल' असा प्रकल्प : हा टनेल एकूण ९ किलोमीटर लांबीचा असून ३ किलोमीटरचा सिंगल स्पॅन टनेल हा शहरी भागातील इंजिनियरिंगच्या दृष्टीने एक मोठे यश मानले जात आहे. हा टनेल सुमारे ७०० मालमत्तांच्या खालीून जाणार असून त्यात अनेक हेरिटेज बिल्डिंग्सचा समावेश आहे. याशिवाय सेंट्रल आणि वेस्टर्न रेल्वे लाईन्स तसेच मेट्रो लाईन-3 च्या 50 मीटर खाली हा टनेल खोदला जाणार आहे.
“अशा गुंतागुंतीच्या संरचनेखाली टनेल तयार करणे म्हणजे एक अभियांत्रिकी चमत्कारच आहे,” असे फडणवीस यांनी पत्रकार परिषदेत नमूद केले. एल अँड टी कंपनीने हा प्रकल्प हाती घेतला असून याच कंपनीने कोस्टल रोड टनेलचे कामही यशस्वीरीत्या पूर्ण केले आहे. डिसेंबर 2028 हा या प्रकल्पाचा अधिकृत पूर्णता कालावधी असला तरी “सहा महिने अगोदर पूर्ण करण्याचा प्रयत्न सुरू आहे,” असेही ते म्हणाले.
पर्यावरण संवर्धन आणि वृक्षतोड प्रकरणावर भूमिका स्पष्ट: नाशिक कुंभमेळा परिसरातील वृक्षतोडीच्या मुद्द्यावर बोलताना फडणवीस यांनी पर्यावरण संवर्धनाची आपली भूमिका स्पष्ट केली. “झाडे कापणे कोणत्याही परिस्थितीत योग्य नाही आणि आम्हीही तेच मत मांडले आहे. पण वास्तविकता पाहिली तर, साधुग्रामासाठी उपलब्ध जागा मर्यादित आहे. 2015-16 च्या गूगल इमेजरीमध्ये येथे झाडे नव्हती. मागील सरकारच्या काळातील वृक्षारोपण मोहिमेत ही झाडे लावली गेली. आज साधुग्राम उभारण्याची आवश्यकता निर्माण झाल्यावर ती अडथळा ठरत आहेत,” असे त्यांनी स्पष्ट केले.
फडणवीस यांनी सांगितले की, “झाडे कमीत कमी प्रमाणात हलवली जातील आणि शक्य असल्यास पुनर्स्थापित केली जातील. बोटनिस्ट आणि वनविभागाच्या तज्ञांच्या मार्गदर्शनाखालीच अंतिम निर्णय घेतला जाईल.”
कुंभमेळ्याबाबत अनावश्यक राजकारण सुरू असल्याचा आरोप करत त्यांनी सांगितले की, “कुंभमेळा ही सनातन परंपरेची ओळख असून पर्यावरणाच्या हानीचे साधन कधीच नाही. उलट, गोदावरी स्वच्छ करण्यासाठी आणि मोठ्या प्रमाणावर वृक्षारोपणासाठी राज्य सरकार सातत्याने कार्यरत आहे.”
महापालिका निवडणुका : कार्यकर्त्यांना प्राधान्य - महापालिका निवडणुकांमध्ये तीनही पक्षांच्या कार्यकर्त्यांना संधी देण्याचा निर्णय योग्य असल्याचे फडणवीस यांनी नमूद केले. “कार्यकर्ता हा पक्षाची शेवटची पण सर्वात मजबूत कणा आहे. आम्ही स्वतः छोट्या शहरांमध्ये प्रचार केला कारण कार्यकर्ता लढत होता,” असे ते म्हणाले.
निवडणुकांमध्ये तणावाच्या किरकोळ घटना घडल्या असल्या तरी एकंदरीत मतदान शांततेत पार पडल्याचे त्यांनी सांगितले. "आमचीही स्पष्ट सूचना होती की त्रिपक्षीय गठबंधनात कोणीही एकमेकांचा शत्रू नाही," असे त्यांनी स्पष्ट केले.
ईव्हीएम बदलाच्या आरोपांवर प्रतिक्रिया : 21 डिसेंबरच्या मतमोजणी पुढे ढकलण्याच्या निर्णयावर असंतोष व्यक्त करत त्यांनी सांगितले की, “न्यायालय आणि निवडणूक आयोग यांचे निर्णय आम्ही मान्य करतो. पण हा निर्णय योग्य नाही असे माझे मत आहे.” तसेच, “परिणाम जसे लागतील, त्यानंतर काही पक्ष ईव्हीएम बदलल्याचा आरोप करणार हे आता ठरलेलंच आहे,” असे त्यांनी टोला लगावला.
त्यांनी सर्व विरोधी पक्षांना ईव्हीएम ठेवण्याच्या ठिकाणी आपल्या प्रतिनिधींची 24 तास नियुक्ती करण्याचे आवाहन केले. “हारल्यानंतर आरोप होऊ नयेत म्हणून ही सर्वोत्तम पद्धत आहे,” असे ते म्हणाले.
टनेल प्रकल्पामुळे मुंबईच्या वाहतुकीला मोठा दिलासा : संपूर्ण प्रकल्पामुळे मुंबईच्या पूर्व आणि पश्चिम उपनगरांपासून दक्षिण मुंबईपर्यंतचा वेळ मोठ्या प्रमाणात कमी होणार आहे. शिवडी-वरळी सी-लिंक आणि नव्या टनेलच्या जोडणीमुळे नवी मुंबई आंतरराष्ट्रीय विमानतळापर्यंत पोहोचण्याचा मार्ग सुलभ होईल. "मुंबईकरांना वाहतूक कोंडीपासून दीर्घकालीन दिलासा मिळण्यासाठी हा प्रकल्प अत्यंत महत्त्वाचा आहे," असे फडणवीस म्हणाले.